Skip to Content

    Neggschti Termin

     
    19. Okt., 19:30 to 20. Okt.,- 19:45
    Vortrabsusflug
    21. Okt., 20:00 - 22:00
    Drummle und Pfyffe
    23. Okt., 15:45 - 16:30
    Drummle Glaini F1

Fasnacht schnuppern

Fasnacht schnuppern

 

Glaini Opti-Mischte am ZJTPF Entfelden

Glaini Opti-Mischte am ZJTPF Entfelden

Am Wuchenänd vom 22. und 23. Septämber hett s Zentralschwyzerische Jungdambuure und -pfyfferfescht stattgfunde. Am Samschtig demoorge hänn sich 13 Glaini Opti-Mischte uff e Wäg ins aargauische Entfelden gmacht. Dört akoo, sinn mir denn zerscht emol s ganze Gepäck und d Drummle ins Instrumäntedepot go stelle und dernoo grad go z Mittagässe. Denn isch es au grad losgange, d Pfyffer sinn als Sektion nomol dr Dudelsagg und d Route go yebe, dr Simon hett sich intensiv uff si Ainzelwettbewerb vorberaitet. Gege dr spöteri Noomidaag hänn denn au d Ramona und d Annika ihr Solo-Duo Ufftritt mit Dambuure uss Mümliswil-Ramiswil hinter sich broocht und dr Simon und sini Schwester Anina hänn dr erschti Daag im Solo -Duo abgschlosse. nach em z'Nacht sinn alli go gässle und bi Super-Wätter hett me au zoobe no kenne scheen dusse sitze. Nach ere relativ kurze Nacht (Turnhalle und Schloofmaträtzli lönn griesse) und em Morgenässe, sinn d Pfyffer sich für s Sektionsspiil go ypfyffe und zwai Dambuure hänn no miesse d Route fertig usswändig leerne 😱😱😱 Am Zwanzig ab Zwölfi sinn denn alli fertig gsi mit ihrne Wettspiel und mit em Umzug am Noomidaag hett das Fescht si Abschluss gfunde. D Rangverkündigung hänn mr ussgloo, die maischte Kinder sinn nach däm intensive Wuchenänd froh gsi, nid allzu spoot haime z koo, schliesslich stoot jo no e Wuche Schuel aa. Es isch e asträngendes Wuchenänd gsi, aber allne hett’s vyl Spass gmacht! An dere Stell möcht ych mi bi allne bedangge wo a däm Wuchenänd im Ysatz gsi sinn, siggs als Beglaitperson, Fahrdienscht oder Instruktion. Neggscht Joor findet kai ZJTPF statt, derfür isch Ändi Septämber 2020 s Eidgenössiche vo de Junge draa.

Drummelbögglikaschte

Drummelbögglikaschte

Schluss mit Böggli in de Bängg versorge... Neu gitts e Drummelbögglikaschte wo me d Böggli suuber versorge ka und ebefalls no Platz für d Schlegel hett. Dä Kaschte stoot neu oobe bim Ygang und ka numme mit emene Källerschlüssel uffgmacht wärde. Es hänn insgesamt 30 Böggli und 60 Paar Schlegel platz. Me ka alles suuber versorge und so wärde d Böggli hoffentlig nümm so schnäll kaputt goo. Jede Dambuur griegt au si aigenes Fächli für d Schlegel. Dä Kaschte isch vom Pascal und Felix Münch baut worde (e baar Impressione findet ihr in dr Bildergalerie). Härzligge Dangg, Pascal und Felix!!!

Dambuurebummel 2019

Dambuurebummel 2019

Am 17. Auguscht hänn sich d Dambuure, 13 an dr Zahl, troffe um ändlig s Abschiidsgschängg vom JC yyzlööse. Me isch vo Basel nach Uttige im Kanton Bärn zum Aareböötle gfaare, wo me nach ere kurzy Yylaitig (e baar Hiwiis zur Aare, em Yy -und Usstiig und ganz wichtig: kaini Brückepfyyler ramme) denn schnäll uff dr Aare gsi isch. Bi aagnähme 26 Grad (Aare 18°), lychtem Sunneschyyn sinn mir in rund 3 Stund vo Uttige bis zem Camping Eichholz in Bärn uff dr Aare böötlet, hänn e Riisespass ka und es au gschafft ai Bruggepfyyler z ramme: d Brugg stoot aber no ;-) Nach em Zruggbringe vo de Böötli und dr Ussrüschtig, hett’s denn an dr Aarebar nomol e kurze Stopp gä, bevor mr alli zimlig uff dr Schnuure in Zug nach Base gstiige sinn. Mit emene faine Znacht im Restaurant Noohn isch dr Bummel denn z Änd gange.

Mediespiegel

Mediespiegel

Au Dasjoor sinn mr in de Medie prominänt vrträtte gsi. Ob bi Nau oder gar dr NZZ isch unsere Zug und unseri Ladäärne e beliebts Fotisujet gsi. Speziell im 2019 isch, dass es sogar e Värsli vo unsere Lampe bis in Ständeroot gschafft het. So heissts im amtligge Bulletin vom 11. Meerze: Zitat: " Fetz Anita (S, BS): Nachdem das geklärt ist, ist es, denke ich, sicher noch klarer, dass man diese Motion unterstützen sollte – ich unterstütze aber auch die Motion Comte. Wir reden hier immer von Waffenlieferungen in Konfliktgebiete, das ist ja das Thema. Dass das Thema brisant ist, kann ich Ihnen nicht zuletzt aus der Basler Fasnacht erzählen: Die hat ja heute Morgen um vier Uhr begonnen. Und was ist mir um fünf Uhr begegnet? Das Thema auf unserer Traktandenliste! Im betreffenden Vers hat es geheissen: "D'Helvetia isch nimme unseri Landesmuetter. Si verkauft jetzt Waffe, das bööse Lueder." Alles, was an der Basler Fasnacht aufgenommen wird, ist ziemlich brisant und in der Bevölkerung als Thema vorhanden." Provisorische Fassung des amtlichen Bulletin des Ständerats, 5016, Fünfte Sitzung, 11.02.19, 15:15, 18.4084 Bim letschte Link, ka me d Reed au im Video aaluege.

Uff dr Gass

Uff dr Gass

 

D Stammlampe am Zischtig uff dr Mugge

D Stammlampe am Zischtig uff dr Mugge