Wie immer am 3. Bummelsonntag waren auch die Ewige Opti-Mischte unterwegs. Wir haben es genossen. Dies ist immer auch eine gute Gelegenheit, auf die tolle Fasnacht zurückzublicken und sich auch bei den vielen Helfern zu bedanken. Diesmal in Versform durch R. Büttler.

<b style="mso-bidi-font-weight: normal">Fasnachtsdangg

 

 

 

D’Fasnacht isch scho widder lang verbyy

und wie allewyyl, isch si wider herrlig gsi.

Will ych wett ass daas no lang soo blybt

Mecht ych mi bedangge bi all de Lyt

wo iiri Zyyt ganz sälbverstäntlig welle

uns alle zur Verfiegig stelle.

 

 

Zerscht dängg ych do an die zwai, wo brobiere

uns Pfyffer und Drummler z forciere

ass mir mit unserem Könne e weenely brilliere.

 

 

Oder die wo so am Mändig spoot z’Oobe

no mache, ass es brutzlet und duftet uss em Oofe,

wo luege ass mir nid uff em Droggene sitze mien

und s’Flüssige scho baraad stelle dien.

 

 

Mi Dangg goot natürlig au an die

wo mit mir zämme d’Fasnacht vorberaite dien.

Das sin die wo moole, gläbe und dien schnyyde,

die wo Idee sammle, dichte und dr Zeedel schryybe

wo naie, boore, hämmere und dien gschtalte

und bi allem au no dr Humoor dien bhalte.

 

 

D’Fasnacht ooni unseri Cliquebaiz wär ziimlig drogge.

Au gniesse mir dr Momänt zem gmietlig aanehogge

Drum ganz vyyle Dangg de baide guete Gaischter

Iir sind in däm Fach absoluti Maischter.

 

 

Dr Dangg fir s’Organisiere vo unsere drey Fasnachtsässe

mecht ych an däre Stell ganz sicher nid vergässe.

Es isch wie allewyyl e Super-Mega-Bombe gsi

Mit em droggne vo dr Wösch no oobedrii.

 

 

Dr nägschti Dangg goot an die, wo unsere Clique zem funktioniere bringe

wo luege ass alles guet goot und au ass unseri Finanze stimme

an die wo an dr Fasnacht s’Zepter schwinge und wo’s duure goot bestimme.

 

 

Mit Danggscheensaage bi-n-ych jetzte duure

Und hör uff bivor mir dr Kopf duet suure.

Jä, und widder isch e herrligi Fasnacht verbyy

Uff die nägscht stoosse mr aa mit eme Gleesli Wyy.